Serbiyada SOCAR-ın iştirakı ilə qaz elektrik stansiyasının tikintisi ölkənin enerji təhlükəsizliyinin gücləndirilməsi baxımından mühüm layihə kimi qiymətləndirilir.

“Geoenergetika” nəşrinin baş redaktoru Boris Martsinkeviç layihənin Serbiya üçün xilasedici dairə rolunu oynaya biləcəyini bildirib.

Ekspertin sözlərinə görə, Serbiyanın hava şəraitindən asılı olmayan öz elektrik enerjisi istehsal güclərinə ehtiyacı var. Quraqlıq dövrlərində su elektrik stansiyalarında istehsal azalır, qonşu ölkələrdən elektrik enerjisi idxal etmək imkanları isə məhdudlaşır.

Bu baxımdan qazla işləyən elektrik stansiyası Serbiyaya daha sabit enerji istehsalı imkanı verə bilər.

Layihə SOCAR üçün də iqtisadi baxımdan əhəmiyyətlidir. Martsinkeviç qeyd edib ki, yeni stansiya Azərbaycan qazına sabit tələbat yaradacaq. Bununla yanaşı, elektrik və istilik enerjisinin satışından əlavə gəlir əldə etmək imkanı yaranacaq.

Ekspert vurğulayıb ki, SOCAR layihədə qarşılıqlı faydalı şərtlərlə fəaliyyət göstərir və tərəflərdən heç birinin maraqlarına zidd addım atmır.

---

---