Ukrayna prezidenti Volodimir Zelenski öz komandasına müharibəni mümkün qədər tez bitirmək barədə tapşırıq verib.

Bu barədə Ukrayna Prezident Ofisinin rəhbəri Kirill Budanov bazar ertəsi Kiyevdə keçirilən "Təhlükəsizlik Arxitekturası" forumunda bəyanat verib.

Onun sözlərini "Suspilne" sitat gətirib.

"Prezidentin göstərişi bu müharibəni mümkün qədər tez bitirməyə çalışmaqdır. Arzuolunandır ki, qışa qədər buna nail olaq. Mən də Prezident Ofisinin rəhbəri kimi bu məqsədə çatmaq üçün əlimdən gələni edəcəyəm", - deyə Budanov bildirib.

Əvvəllər Ukrayna Müdafiə Nazirliyinin Baş Kəşfiyyat İdarəsinə rəhbərlik etmiş Budanov əlavə edib ki, Zelenski tərəfindən qarşıya qoyulan bu "vaxtında və düşünülmüş" tapşırığın icrası üzərində hazırda bütün məsul strukturlar çalışır.

Onun sözlərinə görə, Kiyevin bu məqsədə çatmaq üçün lazımi imkanları var, lakin Moskva müvafiq razılaşmalardan imtina edə bilər.

"Əgər Rusiya nəticədə imtina edərsə, bu da mümkündür, unutmayın. Lakin, artıq hərbi əməliyyatların dayandırılması üçün əsasların mövcud olduğuna dair real əlamətlər var", - deyə o qeyd edib.

---

---