Yəməndəki husi qruplaşması ("Ənsar Allah" hərəkatı) Səudiyyə Ərəbistanının kritik enerji infrastrukturuna qarşı genişmiqyaslı hücumlar həyata keçirdiyini bəyan edib.

Husilərin hərbi nümayəndəliyinin yaydığı rəsmi açıqlamaya əsasən, zərbələr iki əsas strateji hədəfə yönəldilib. İlk hücum krallığın neft nəqlində həyati əhəmiyyət daşıyan "Şərq-Qərb" (East-West) boru kəmərinin nasos stansiyasına, ikinci zərbə isə Qırmızı dəniz sahilində yerləşən Yanbu liman şəhərindəki iri neft obyektinə endirilib.

Qeyd edək ki, gündəlik ötürmə gücü milyonlarla barel olan "Şərq-Qərb" boru kəməri Hörmüz boğazından yan keçməklə Səudiyyə neftini birbaşa Qırmızı dənizdəki Yanbu ixrac terminallarına çatdıran əsas alternativ arteriyadır.

Hörmüz boğazında gəmiçiliyin iflic olduğu və tankerlərin hədəfə alındığı bir vaxtda bu marşrutun da vurulması qlobal enerji bazarlarında ciddi təşviş yaradıb. Rəsmi Ər-Riyad hələlik hücumların miqyası və dəyən ziyanın həcmi ilə bağlı geniş açıqlama verməyib.

---

---