Dünya enerji bazarlarında gərginlik son həddə çatıb və neftin qiyməti artıq 100 dolları keçib.

İranın xarici işlər naziri Abbas Araqçi öz "X" hesabında paylaşım edərək, Qərb ölkələrini və qlobal iqtisadiyyatı ağır neft krizi ilə hədələyib. Nazir ABŞ-ın "Epic Fury" (Epik Qəzəb) əməliyyatını "Epik Səhv" adlandıraraq, cəmi doqquz gün ərzində neft qiymətlərinin ikiqat artdığını və bütün əsas malların bahalaşdığını xatırladıb. Araqçinin sözlərinə görə, Vaşinqton İranın neft və nüvə obyektlərinə qarşı planlar qurmaqla böyük bir inflyasiya şoku yaratmağa çalışır, lakin Tehranın buna cavab olaraq hələ istifadə etmədiyi "çoxsaylı sürprizləri" var. Eyni zamanda, İranın İslam İnqilabı Keşikçiləri Korpusu (SEPAH) daha sərt bəyanat yayaraq, Hörmüz boğazından "bir litr belə neftin" ixracına icazə verməyəcəklərini bəyan edib.

Hazırda strateji boğaz ətrafında tanker hərəkətliliyi 80% azalıb və 150-yə yaxın gəmi açıq dənizdə hərəkətsiz qalıb. ABŞ kəşfiyyatı isə İranın boğazın ən dar nöqtələrinə dəniz minaları döşəmək üçün hazırlıq gördüyünə dair görüntülər əldə edib ki, bu da beynəlxalq sığorta şirkətlərinin bölgədəki xidmətlərini tamamilə dayandırmasına səbəb olub. Ekspertlər xəbərdarlıq edirlər ki, əgər bu blokada davam edərsə, dünya iqtisadiyyatı müasir tarixin ən böyük enerji şoku ilə üz-üzə qalacaq və yanacaq qıtlığı qlobal miqyasda xaos yaradacaq.

---

---