Avropalı diplomatlar və hərbi rəsmilər Ukrayna ilə Rusiya mövqeləri arasında 40 kilometrlik bufer zonanın yaradılmasını gündəmə gətiriblər.

Bu barədə “Politico” yazıb.

Məlumata görə, plan atəşkəsin təmin edilməsi variantlarından biri olaraq bufer zonada sülhməramlı qüvvələrin yerləşdirilməsini nəzərdə tutur. Lakin layihənin həyata keçirilməsi Kiyevdən ərazi güzəştləri tələb edir. Bu səbəbdən təşəbbüs mübahisəli sayılır, çünki Ukraynanın rəsmi mövqeyində ərazi güzəştləri ilə bağlı heç bir razılıq yoxdur.

“Politico” qeyd edir ki, ABŞ bu müzakirələrdə fəal iştirak etmir.

Keçmiş Pentaqon rəsmisi Cim Taunsend ideyanı sərt tənqid edib:
“Onlar saman çöpünə sarılırlar. Ruslar avropalılardan qorxmurlar. Əgər bir neçə müşahidəçinin işğalı dayandıra biləcəyini düşünürlərsə, yanılırlar”.

Bəzi Avropa rəsmiləri isə mümkün bufer zonanı Koreya yarımadasındakı demarkasiya xətti ilə deyil, Almaniyanın Soyuq Müharibə dövründəki bölgüsü ilə müqayisə edirlər.

Plana əsasən, zonada patrul xidməti aparmaq üçün 4 min – 60 min arasında hərbçi göndərilə bilər. Potensial iştirakçılar sırasında artıq müttəfiq dəstəyi üçün lobbiçilik edən Britaniya və Fransa da var.

---

---