Eltun Süleymanov:"Yeni Ağdam Böyük Qayıdışın, quruculuğun və milli inkişafın ünvanıdır"

Bu gün Qarabağda baş verən tarixi dəyişikliklərin ən parlaq nümunələrindən biri Ağdamdır. Bir vaxtlar işğalın ağır nəticələri ilə üzləşmiş, yaşayış məntəqələri və mədəni irsi dağıdılmış bu şəhər indi müasir şəhərsalmanın, iqtisadi dirçəlişin, sosial infrastrukturun yenilənməsinin və Böyük Qayıdışın mühüm mərkəzinə çevrilir. 20 Noyabr – Ağdam Şəhəri Günü münasibətilə şəhərin keçdiyi inkişaf yoluna nəzər salmaq, görülən işləri dəyərləndirmək və qarşıda duran hədəfləri müəyyənləşdirmək xüsusi əhəmiyyət daşıyır.
Bu sözləri aia.az-a açıqlamasında Eltun Süleymanov deyib.
Müsahibimiz deyib ki, Ağdamın gələcək inkişafı sistemli şəhərsalma yanaşmasına əsaslanır. Baş planın əsas məqsədi Ağdamı müasir infrastrukturla təmin olunmuş, insanların rahat yaşayışı üçün əlverişli, iqtisadi baxımdan fəal və ekoloji cəhətdən dayanıqlı şəhərə çevirməkdir. Şəhərdə beş yaşayış məhəlləsinin yaradılması nəzərdə tutulur. Yeni binaların tikintisi ilə yanaşı, su, elektrik, qaz və digər kommunal xidmətlərin təşkili, yolların çəkilməsi, ictimai məkanların salınması da kompleks şəkildə həyata keçirilir. Həmçinin Ağdamın gələcəkdə 100 min nəfər əhalinin yaşayacağı böyük şəhərə çevrilməsi planlaşdırılır. Bu hədəfə çatmaq üçün yaşayış fondunun genişləndirilməsi ilə yanaşı, yeni iş yerlərinin yaradılması, sahibkarlığın inkişafı, təhsil və səhiyyə xidmətlərinin əlçatanlığı da mühüm şərtlərdir. Ağdamın dirçəlişinin əsas məqsədi onun sakinlərinin doğma torpaqlarına təhlükəsiz və dayanıqlı şəkildə qayıtmasını təmin etməkdir. Uzun illər məcburi köçkün həyatı yaşamış insanlar üçün yeni evlərin tikilməsi tarixi ədalətin bərpasının ən mühüm nəticələrindən biridir. Ağdam rayonunda Kəngərli, Xıdırlı və Sarıcalı kəndlərində bərpa və məskunlaşma layihələri həyata keçirilir. Yeni yaşayış evləri ilə yanaşı, məktəblər, uşaq bağçaları, inzibati binalar və icma mərkəzləri də yaradılır. Bu obyektlər kənd həyatının yenidən canlanması və sakinlərin gündəlik ehtiyaclarının qarşılanması üçün zəruri şərait formalaşdırır. 2025-ci il martın 27-də Sarıcalı kəndində, mayın 10-da isə Kəngərli kəndində məskunlaşmanın yeni mərhələləri ilə bağlı mühüm tədbirlər keçirildi. Kəngərlidə yaşayış evlərinin, məktəbin, uşaq bağçasının və digər sosial obyektlərin istifadəyə verilməsi qayıdış prosesinin real nəticələrini göstərdi. Həmin gün Ağdam Muğam Mərkəzinin və Dəmir Yolu və Avtovağzal Kompleksinin açılışı da şəhərin həyatında əlamətdar hadisələr oldu. Böyük Qayıdışın uğuru yalnız köçürülən ailələrin sayı ilə ölçülmür. Əsas məsələ insanların doğma torpaqlarında uzunmüddətli və təhlükəsiz həyat qurmasıdır. Bu baxımdan Ağdamda həyata keçirilən layihələr bir-birini tamamlayan inkişaf mərhələləridir. Yeni ev ailəyə yaşayış imkanı verir, məktəb uşaqların gələcəyini formalaşdırır, müəssisələr iş yeri yaradır, nəqliyyat infrastrukturu isə şəhərin digər bölgələrlə iqtisadi və sosial əlaqələrini gücləndirir. İşğaldan azad edilmiş ərazilərin bərpasında iqtisadi inkişaf xüsusi əhəmiyyət daşıyır. Ağdamın yalnız yaşayış məntəqəsi kimi deyil, istehsal və məşğulluq mərkəzi kimi inkişaf etdirilməsi bu strategiyanın əsas istiqamətlərindəndir. Cənab Prezident İlham Əliyevin 28 may 2021-ci il tarixli müvafiq fərmanı ilə yaradılan Ağdam Sənaye Parkı 190 hektar ərazini əhatə edir. Parkın əsas məqsədi Qarabağın sənaye potensialını reallaşdırmaq, sahibkarlığı dəstəkləmək, yerli istehsalı genişləndirmək və əhalinin məşğulluğunu artırmaqdır. Təqdim olunan məlumatlara görə, Ağdam Sənaye Parkında 28 sahibkarlıq subyektinə rezidentlik, dörd sahibkara isə qeyri-rezidentlik statusu verilmiş, parkda doqquz müəssisənin fəaliyyəti təşkil olunmuş, beşdən çox müəssisənin tikintisi davam etdirilmişdir. Müasir şəhərin inkişafı üçün nəqliyyat əlaqələrinin gücləndirilməsi əsas şərtlərdəndir. Ağdamda avtomobil və dəmir yolu infrastrukturunun yenilənməsi şəhərin iqtisadi imkanlarını genişləndirir, sakinlərin hərəkətini asanlaşdırır və regionlararası əlaqələrin inkişafına şərait yaradır. Bərdə–Ağdam avtomobil yolunun istifadəyə verilməsi bölgəyə gediş-gəlişin yaxşılaşdırılması və tikinti-istehsal layihələrinin təminatı baxımından mühüm əhəmiyyət daşıyır. Dəmir yolu xəttinin inkişafı isə Ağdamın daha geniş nəqliyyat şəbəkəsinə inteqrasiyasına xidmət edir. 2024-cü il aprelin 25-də Ağdam Cümə məscidinin bərpadan sonra açılması, həmin ilin sentyabrında İmarət kompleksinin yenidən istifadəyə verilməsi tarixi irsin bərpası istiqamətində əlamətdar hadisələr oldu. 2025-ci il iyulun 18-də isə Qiyaslı kəndindəki tarixi məscid bərpadan sonra açıldı.
Ağdamın gələcək inkişafında ən vacib meyar insan amilidir. Bu məqsədlə Ağdamda təhsil müəssisələrinin, uşaq bağçalarının, səhiyyə obyektlərinin, ictimai xidmət binalarının və istirahət məkanlarının yaradılması istiqamətində işlər aparılır. Rayonun inkişafı üçün səhiyyə xidmətlərinin əlçatanlığı, peşə hazırlığı, rəqəmsal xidmətlər və sosial infrastrukturun genişləndirilməsi də vacibdir. Bərpa prosesində minatəmizləmə tədbirlərinin əhəmiyyəti də xüsusi qeyd edilməlidir. Təhlükəsiz yaşayışın, kənd təsərrüfatının və iqtisadi fəaliyyətin təmin olunması üçün ərazilərin mina və partlamamış hərbi sursatlardan təmizlənməsi zəruridir. Bu işlər insanların həyat və sağlamlığının qorunması baxımından həyati əhəmiyyət daşıyır. 2020-ci ilin noyabrında Ağdamda Dövlət Bayrağının ucaldılması ilə başlayan yeni mərhələ sonrakı illərdə yol, yaşayış, sənaye, mədəniyyət və sosial infrastruktur layihələri ilə davam etdirildi. Hər yeni obyekt şəhərin ümumi inkişaf planının bir hissəsi kimi əhəmiyyət daşıyır. Ağdamın gələcək perspektivləri bir neçə əsas istiqamətlə müəyyənləşir: yaşayış məntəqələrinin bərpası, iqtisadi fəallığın artırılması, müasir nəqliyyat şəbəkəsinin qurulması, tarixi-mədəni irsin qorunması və insanların doğma yurdda dayanıqlı həyatının təmin edilməsi. Şəhərin 2040-cı ilədək inkişafına dair Baş planı bu hədəflərin sistemli şəkildə həyata keçirilməsi üçün mühüm çərçivə yaradır. Doğma yurda qayıdan ailənin öz evində rahat yaşaması, uşağın məktəbə təhlükəsiz gedə bilməsi, gəncin iş tapması, sahibkarın istehsalını genişləndirməsi və mədəniyyət xadiminin öz sənətini yaşatması yeni Ağdamın uğurunu müəyyənləşdirən əsas göstəricilərdir.
20 Noyabr-Ağdam Şəhəri Günü münasibətilə bu şəhərin keçdiyi yola nəzər saldıqda aydın görünür ki, Ağdamın taleyi işğalın dağıntılarından quruculuğun geniş üfüqlərinə doğru dəyişir. Burada hər yeni yaşayış binası, hər açılan məktəb, hər istehsal müəssisəsi və hər bərpa olunan tarixi abidə Azərbaycanın gələcəyə inamını ifadə edir. Ağdamın əvvəlki şöhrətinin bərpası onun keçmişinin təkrarlanması deyil, zəngin tarixi irsin müasir inkişaf imkanları ilə birləşdirilməsidir. Qarşıya qoyulan məqsəd daha təhlükəsiz, daha müasir, iqtisadi cəhətdən güclü və insanları üçün əlverişli bir şəhər qurmaqdır-deyə E. Süleymanov fikirlərini yekunlaşdırıb.
Mətndə səhv var? Onu siçanla seçin və Ctrl+Enter düyməsini basın.
Teqlər: