Sosial şəbəkələrdə Vətən müharibəsi şəhidi Nicat Salahovun anası Aygün Salahovanın çarəsiz vəziyyətdə olması ilə bağlı məlumat yayılıb.

Onun yaşadığı ərazidə istilik olmadığı, xəstə şəhid anası ilə heç kimin maralanmadığı bildirilib.

Əmək və Əhalinin Sosial Müdafiəsi Nazirliyinin tabeliyində Sosial Xidmətlər Agentliyinin mətbuat xidmətinin rəhbəri Murad Həşimov isə bildirib ki, ananın qaldığı yer dövlət uşaq müəssisələrinin məzunları üçün olan binadır:

“Bura Əmək və Əhalinin Sosial Müdafiəsi Nazirliyinin tabeliyində Sosial Xidmətlər Agentliyinin Məzun Evidir. Yuxarı mərtəbə olduğu üçün nasoslarda nasazlıq səbəbindən istilik sistemi çatdırmayıb. Artıq lazımi addım atılıb. Sözügedən mənzil də təmir prosesində müvəqqəti olaraq qızdırıcı cihazla isidilib”.

Qurum rəsmisi şəhid anası ilə bağlı paylaşım edənləri vəziyyətlə yerində tanış olmaq üçün sözügedən binaya baxmağa da dəvət edib.

Qeyd edək ki, əsgər Salahov Nicat Fikrət oğlu 44 günlük Vətən müharibəsində qəhrəmancasına döyüşüb və müvafiq medallarla təltif edilib.

---

---