Uşaqlarda uzunmüddət telefona baxmaq - yəni başın daim önə əyilmiş vəziyyətdə qalması boyun və başın ön hissəsindəki əzələlərə, fassiyalara və servikal (boyun) fassiya zəncirlərinə daimi gərginlik yaradır.

Bu sözləri fizioterapevt Nuriyyə Əlibəyli deyib. O bildirib ki, uzun müddət belə dayandıqda damarlar sıxılır, beyin qan dövranı zəifləyir:

“Hətta yaddaş zəifləməsinə gətirib çıxara bilər.

Normalda insan başının çəkisi təxminən 4-5 kq olur. Lakin baş 30-60° bucaq altında öndə tutulduqda, boyun fəqərələrinə düșən təzyiq 20-25 kq-a qədər artır”.

Fizioterapevt bu vəziyyət uzunmüddətli olacağı təqdirdə yaşana biləcək problemlərdən də söz açıb:

* Boyun əzələlərində xroniki gərginlik;
* Servikal lordozun azalması;
* Baş ağrısı və çiyin ağrıları;
* Hətta gələcəkdə onurğa deformasiyası müşahidə oluna bilər.

Uşaqlarda böyüklərlə müqayisədə daha təhlükəlidir, çünki:

* Onların sümükləri hələ tam sərtləşməyib;
* Əzələ ve bağ sistemi inkisaf mərhələsindədir;
* Duruş refleksi zəifdir və asanlıqla dəyişir.

Mütəxəssis boyun və onurğa problemlərinin qarşısını almaq üçün bir neçə tövsiyə də verib:

1. Telefon ve planşet istifadəsini gündə 1- 2 saatla məhdudlaşdırın;
2. Ekranı göz səviyyəsinə qaldırın;
3. Hər 20-30 dəqiqədən bir fasilə verin;
4. Boyun üçün sadə streçing və hərəkət məşqləri etdirin;
5. Açıq havada fiziki aktivliyi artırın.

Uzunmüddətli hallarda proprioseptiv disfunksiya - bədənin məkan hissi pozulur, uşaqda duruş pozğunluğu (skolioz, kifoz, lordoz, başın yan tutulması) inkişaf edə bilər.
Osteopatik baxımdan, bu vəziyyət "anterior head syndrome" və ya "text neck" kimi tanınır. Müalicədə əsas məqsəd - aponevroz və fassiya gərginliyini aradan qaldırmaq, kəllə-bazis əlaqəsini normallaşdırmaq və düzgün duruşun bərpasıdır”.

---

---