Ali Məhkəmədə hakim Əli Syfəliyevin sədrliyi ilə həbsdə olan “Laçın” ticarət mərkəzinin rəhbəri Sunay Vəliyevin kassasiya şikayəti ilə bağlı məhkəmə prosesi keçirilib.
Keçirilən prosesdə qərar elan edilib və qərara əsasən, Sunay  Vəliyevin barəsindəki 3 il 6 aylıq cəza müddəti azaldılıb.

Beləliklə onun həbsdə olma müddəti nəzərə alınaraq azadlığa buraxılıb.

Qeyd edək ki, hadisə ötən il fevralın 9-da Bakının Xətai rayonu, Zığ yolu küçəsində baş verib. 40 yaşlı S.Vəliyev idarə etdiyi “Mercedes-Benz GLS” markalı, 99-VS-999 dövlət qeydiyyat nişanlı avtomobillə hərəkətdə olan zaman yolu keçmək istəyən piyada, 1969-cu il təvəllüdlü Müşfiq Əliyevi vuraraq öldürüb. vurub. Ağır bədən xəsarətləri alan yaralı elə yerindəcə dünyasını dəyişib.
Sunay Vəliyev isə hadisə yerindən qaçıb.

Faktla bağlı Xətai Rayon Polis İdarəsinin İstintaq Şöbəsində Cinayət Məcəlləsinin 263.2 (yol hərəkəti və nəqliyyat vasitələrinin istismarı qaydalarını pozma, ehtiyatsızlıqdan zərərçəkmiş şəxsin ölümünə səbəb olduqda) və 264-cü (yol nəqliyyat hadisəsi yerindən qaçma) maddələri ilə cinayət işi başlanıb. İstintaq-əməliyyat tədbirləri nəticəsində S.Vəliyev fevralın 10-da şübhəli şəxs qismində saxlanılıb.

Xətai Rayon Məhkəməsinin hökmü ilə Sunay Vəliyev 3 il 6 ay müddətinə azadlıqdan məhrum edilib.

Xatırladaq ki, Sunay Vəliyev “Laçın” Ticarət Mərkəzinin sahibidir.

---

---