İyunun 12-də səhər tezdən Rusiya ərazisi Ukraynaya məxsus pilotsuz uçuş aparatlarının (PUA) hücumuna məruz qalıb.

Rusiyanın Samara vilayətində "Tolyattikauçuk", Tatarıstanda isə "Nijnekamskneftexim" kimya zavodları dron zərbələri ilə hədəf alınıb.

Zavodun yerləşdiyi Tolyatti şəhərində baş verən silsilə partlayışlardan sonra ərazidən qatı qara tüstü ucalmağa başlayıb. Sosial şəbəkələrdə hadisə yerindən foto və videolar paylaşılır.

"Tolyattikauçuk" Rusiya Federasiyasının ən böyük neft-kimya müəssisələrindən biridir. Burada sənaye, nəqliyyat və xüsusi təyinatlı texnikada istifadə olunan sintetik kauçuk, polimerlər, monomerlər və avtomobil benzinləri üçün qatqılar istehsal edilir.

Zavod, həmçinin Rusiyanın hərbi-sənaye kompleksinin fəaliyyətinə dolayı yolla dəstək verən xammal zəncirinin mühüm halqası hesab olunur.

"Nijnekamskneftexim" isə Rusiya Federasiyasında yük avtomobillərinin şinləri üçün möhkəm kauçuk istehsal edən ən böyük müəssisədir və Rusiya Silahlı Qüvvələri üçün antifriz tədarük etmək sertifikatına malik yeganə şirkətdir. Bundan əlavə, zavod kauçuk istehsalı üzrə liderdir. Belə ki, müəssisə Rusiya bazarının 50%-ni, dünya bazarının isə 43%-ni təmin edir.

Xatırladaq ki, iyunun 12-də Rusiyada dövlət bayramı - Rusiya Günü qeyd olunur.

---

---