Avropa Rusiya neftindən əldə olunan gəlirləri azaltmaq üçün üzərinə düşəni etsə, Ukraynada müharibə 2-3 aya bitəcək və buna zəmanət veririk.

Bunu ABŞ-ın maliyyə naziri Skot Bessent “Bloomberg”ə müsahibəsində deyib.

Onun sözlərinə görə, Avropa ölkələri Rusiyanın neft gəlirlərinin azaldılmasında və müharibənin dayandırılmasında daha fəal rol oynamalıdır.

Amerikalı nazir vurğulayıb ki, Avropa ölkələri Çin və Hindistana yüksək rüsumlar tətbiq etmədikcə, Tramp administrasiyası Çinin Rusiya neftini almasını dayandırmaq üçün Çin mallarına əlavə rüsumlar tətbiq etməyəcək:
“Biz avropalıların töhfə verəcəyini gözləyirik və avropalılar olmadan irəliləməyəcəyik”.

Bessent xatırladıb ki, Tramp Rusiyanı əsas gəlir mənbəyi olan neftdən məhrum etmək üçün Avropa ölkələrini Çin və Hindistana 50-100% arası tariflər tətbiq etməyə çağırıb. O, bəzi Avropa ölkələrinin Rusiya neftini almasını, digərlərinin isə Hindistanda Rusiya neftindən emal olunan məhsulları almasını tənqid edərək, bunun münaqişənin maliyyələşdirilməsinə kömək etdiyini bildirib.

“Mən sizə zəmanət verirəm ki, Avropa Rusiya neftinin alıcılarına əhəmiyyətli ikinci dərəcəli rüsumlar tətbiq etsə, müharibə 60 və ya 90 günə bitəcək”, – deyə Bessent qeyd edib.

O həmçinin bildirib ki, ABŞ Rusiya şirkətlərinə, o cümlədən “Rosneft” və “Lukoil”ə qarşı daha sərt sanksiyaları nəzərdən keçirmək və Moskvanın 2022-ci ildə Ukraynaya müdaxiləsindən sonra dondurulmuş suveren aktivlərindən daha geniş istifadəyə hazırlaşmaq üçün Avropa ölkələri ilə əməkdaşlığa hazırdır.

---

---