Daha bir Afrika ölkəsi olan Qabonda dövlət çevrilişi olub.

Qabonun milli televiziyasına açıqlama verən hərbçilər prezidentin devrildiyini və ölkə sərhədlərinin növbəti xəbərdarlığa qədər bağlı olacağını elan edib.

Hakimiyyəti ələ keçirən hərbçilər Respublika Qvardiyasının komandanı general Bris Oliqi Nqemanı keçid dövrü üçün dövlət başçısı da təyin ediblər.
Qeyd edək ki, qiyamçılar avqustun 26-da keçirilmiş və Əli ben Bonqo Ondimbanın üçüncü müddətə seçildiyi prezident seçkilərinin nəticələrini ləğv ediblər. Hərbçilər prezidentin ailə üzvləri və həkimlərin əhatəsində ev dustağı olduğunu bildiriblər.

Əli ben Bonqo Ondimba özü videomüraciət qeydə alaraq prezident iqamətgahı ərazisində hərbçilər tərəfindən saxlanıldığını təsdiqləyib.

Qabondakı çevrilişdən sonra inqilabçılar devrilmiş prezidentin ailəsinin evində dollar və avrolarla dolu çantaları müsadirə ediblər.(BAKU.WS)

---

---