Ötən günlərdə Türkiyə baş vermiş 7,7 və 7,6 maqnitudalı iki dağıdıcı zəlzələdə ən son açıqlanan məlumatlarda 13 minə yaxın insanın vəfat etdiyi, 63 minə yaxın insanın isə yaralandığı bildirilir.

Ümumilikdə isə 6 mindən çox binanın dağıldığı qeyd olunur.

Zəlzələlərin Türkiyəyə iqtisadiyyatına vurduğu zərər və zərərin məbləği də geniş müzakirə olunan məsələlərdən biridir. Hələ ki Türkiyə rəsmi qurumları tərəfindən zərərin məbləği ilə bağlı hər hansı məlumat açıqlamayıb.

İqtisadçı ekspert Natiq Cəfərli açıqlamasında bildirdi ki, ziyanın həcmi ilə bağlı hələ ki rəy bildirmək çətindir:

“Çünki ziyan görmüş binaların sayı məlum deyil, yalnız uçmuş binaların sayı bilinir. Zərərə gəlincə isə burada söhbət 10 milyardlarla dollardan gedəcək. Rəqəmin hansı səviyyəyə qədər yüksələcəyini isə demək çətindir”.

Ekspertin sözlərinə görə, Türkiyə iqtisadiyyatı iş adamlarının və cəmiyyətinin işləmə qabiliyyətini nəzərə alsaq, maliyyə mənbələrində sıxıntı olmazsa, yaxın 3-4 ildə bu fəsadları tamamilə aradan qaldırmaq gücündədir:

“Düşünürəm ki, burada maliyyə mənbələri ilə bağlı problemlər yaşanacaq. Bu zaman işlər xarici borc və beynəlxalq maliyyə institutlarının yardımı hesabına həyata keçirilə bilər. Çünkü yalnız Türkiyənin daxili resursları hesabına bu qədər işin öhdəsindən gəlmək çətin olar.

“Bəzi mənbələrdə Türkiyəyə dəymiş zərərin 100 milyard dollardan çox olduğu deyilir. Ziyanın səviyyəsinin hansı həddə qədər genişlənəcəyi isə yaxın 1 ayda məlum olacaq”, - deyə N. Cəfərli əlavə edib.

---

---