Bu gün – 26 avqust Azərbaycan Respublikasının Birinci vitse-prezidenti, ölkəmizin birinci xanımı, Heydər Əliyev Fondunun prezidenti Mehriban xanım Əliyevanın doğum günüdür. 1964-cü il avqustun 26-da Bakı şəhərində ziyalı ailəsində dünyaya göz açan Mehriban Əliyevanın keçdiyi zəngin həyat yolu bu gün dövlətçilik, humanizm, milli-mənəvi dəyərlərə sədaqət və insanlara xidmət prinsipləri ilə səciyyələnir.

Mehriban xanım Əliyevanın fəaliyyəti Azərbaycan cəmiyyətinin müxtəlif sahələrini əhatə edir. Təhsil, səhiyyə, mədəniyyət, idman, sosial müdafiə və xeyriyyəçilik istiqamətlərində həyata keçirilən çoxsaylı təşəbbüslər onun ictimai fəaliyyətinin mühüm istiqamətlərini təşkil edir. Hələ 1995-ci ildə onun təşəbbüsü ilə Azərbaycan Mədəniyyət Fondunun yaradılması, sonrakı illərdə milli mədəniyyətimizin təbliği istiqamətində atılan addımlar bu fəaliyyətin geniş miqyasından xəbər verir.

Heydər Əliyev Fondunun prezidenti kimi Mehriban xanım Əliyevanın həyata keçirdiyi layihələrin əsasında insan amili dayanır. Fond Ümummilli Lider Heydər Əliyevin zəngin dövlətçilik irsinin öyrənilməsi və gələcək nəsillərə çatdırılması ilə yanaşı, müxtəlif sosial və humanitar istiqamətlərdə fəaliyyəti ilə tanınır. Xüsusilə qayğıya ehtiyacı olan insanlara, uşaqlara, həssas sosial qruplara göstərilən diqqət mərhəmət və xeyirxahlığın cəmiyyət həyatındakı əhəmiyyətini daha aydın nümayiş etdirir.



Mehriban xanım Əliyevanın fəaliyyətindən danışarkən şəhid ailələrinə və qazilərimizə göstərilən yüksək diqqət və ehtiramı xüsusi qeyd etmək lazımdır. Azərbaycanın ərazi bütövlüyü və suverenliyi uğrunda canından keçmiş qəhrəman şəhidlərimizin əziz xatirəsinə hörmət, onların ailələrinin yanında olmaq, sağlamlığını Vətən yolunda itirmiş qazilərimizin qayğılarına həssas münasibət göstərmək dövlətimizin mənəvi dəyərlərinin mühüm hissəsidir. Mehriban xanım Əliyevanın humanizmə söykənən fəaliyyətində də Vətən qarşısında misilsiz xidmət göstərmiş insanların və onların ailələrinin daim diqqətdə saxlanılması xüsusi məna daşıyır.

Azərbaycan mədəniyyətinin qorunması və dünyada tanıdılması istiqamətində Mehriban xanım Əliyevanın xidmətləri də böyük əhəmiyyət kəsb edir. Milli musiqimizin, şifahi xalq yaradıcılığımızın, tarixi-mədəni irsimizin beynəlxalq səviyyədə təbliği istiqamətində gördüyü işlər müxtəlif illərdə beynəlxalq səviyyədə də qiymətləndirilib. 2004-cü ildə Azərbaycanın şifahi xalq ədəbiyyatı və musiqi irsinin qorunması və inkişafı sahəsindəki fəaliyyətinə görə UNESCO-nun Xoşməramlı səfiri adına layiq görülməsi bunun nümunələrindən biridir.

Mehriban xanım Əliyeva Azərbaycan idmanının inkişafında da mühüm fəaliyyət göstərib. Onun Azərbaycan Gimnastika Federasiyasına rəhbərliyi dövründə ölkəmizdə gimnastikanın müxtəlif növlərinin inkişaf etdirilməsi, idman infrastrukturunun genişləndirilməsi və Azərbaycan gimnastlarının beynəlxalq yarışlarda uğurlar qazanması diqqətçəkən nəticələr sırasında yer alıb. Eyni zamanda, 2015-ci ildə Bakıda keçirilmiş ilk Avropa Oyunlarının Təşkilat Komitəsinə rəhbərlik etməsi Azərbaycanın böyük beynəlxalq idman tədbirlərinin təşkilatçısı kimi tanıdılmasında mühüm rol oynayıb.

2017-ci il fevralın 21-də Prezident İlham Əliyevin sərəncamı ilə Mehriban xanım Əliyevanın Azərbaycan Respublikasının Birinci vitse-prezidenti təyin edilməsi onun dövlətçilik fəaliyyətində yeni mərhələnin başlanğıcı oldu. Bu yüksək dövlət vəzifəsində də sosial məsələlərə həssas münasibət, milli maraqların qorunması, humanitar təşəbbüslərin dəstəklənməsi və Azərbaycan həqiqətlərinin beynəlxalq ictimaiyyətə çatdırılması onun fəaliyyətində mühüm yer tutur.

Mehriban xanım Əliyevanın Prezident İlham Əliyevlə çiyin-çiyinə Azərbaycanın inkişafı naminə göstərdiyi fəaliyyət də xüsusi qeyd olunmalıdır. Dövlətimizin güclənməsi, xalqımızın rifahının yüksəldilməsi, milli birliyin qorunması və Azərbaycanın beynəlxalq nüfuzunun möhkəmləndirilməsi istiqamətində həyata keçirilən siyasətə verdiyi dəstək onun dövlətçilik fəaliyyətinin mühüm istiqamətlərindəndir. Xalqın sevincinə və qayğısına həssas yanaşmaq, insanların yanında olmaq, milli dəyərləri qorumaq onun ictimai obrazının əsas xüsusiyyətləri sırasında dayanır.



Mehriban xanım Əliyevanın fəaliyyəti eyni zamanda Azərbaycan qadınının müasir cəmiyyətdəki yüksək mövqeyinin parlaq ifadəsidir. O, ailə dəyərlərinə sədaqəti, milli ənənələrə bağlılığı, yüksək ziyalılığı, dövlətçilik fəaliyyətində prinsipiallığı və humanist təşəbbüsləri ilə Azərbaycan qadınının gücünü və nüfuzunu beynəlxalq miqyasda nümayiş etdirən şəxsiyyətlərdəndir. Onun çoxşaxəli fəaliyyəti göstərir ki, dövlətə xidmət yalnız böyük siyasi qərarlarla deyil, eyni zamanda bir insanın probleminə həssas yanaşmaq, bir ailəyə ümid vermək, milli irsi qorumaq və gələcək nəsillər üçün dəyər yaratmaqla ölçülür.

Bu əlamətdar gün münasibətilə Azərbaycan Respublikasının Birinci vitse-prezidenti Mehriban xanım Əliyevanı səmimi-qəlbdən təbrik edir, ona möhkəm cansağlığı, ailə səadəti, uzun ömür və dövlətimiz, xalqımız naminə həyata keçirdiyi fəaliyyətində yeni-yeni uğurlar arzulayıram. Arzu edirəm ki, onun xeyirxahlığa, mərhəmətə və milli dəyərlərə xidmət edən təşəbbüsləri bundan sonra da minlərlə insanın həyatına ümid və sevinc bəxş etsin. Doğum gününüz mübarək, hörmətli Mehriban xanım!

Hörmətlə,
Mehman Qəhrəmanov

---

---