Məlum olduğu kimi, koronavirus pandemiyası səbəbiylə Azərbaycanda toylar da daxil olmaqla, bütün kütləvi tədbirlərin keçirilməsinə qadağa qoyulub. Təxminən bir ilə yaxındır ki, toylarla bağlı qadağanın gündəmdə olması, gəliri bu sahədən çıxan müğənniləri işsiz qoyub.
Maraqlıdır, maddi qazancı toylar və şou-proqramlardan formalaşan müğənnilərin gəlirlərini təmin edə biləcək, ikinci bir sənəti varmı?

Mövzu ilə bağlı Sfera.az-a danışan Əməkdar artist Yusif Mustafayev bildirdi ki, heç bir işlə məşğul deyil:

"Müğənnilikdən başqa, heç bir yerdən gəlirim yoxdur. Yəni, elə də bir biznesim yoxdur ki, oradan maddi gəlir əldə edim. Yeganə gəlirimi dövlətdən aldığım pensiya və "Əməkdar artist” adına aldığım müavinət təşkil edir. Təbii ki, övladlarım da mənə çox böyük dəstəkdir. Həm də ki, yaman gün üçün də gərək vaxtında düşünəsən. Həyatın işini bilmək olmur, həmişə insanın üzünə gülməz ki? Gərək hər bir çətinliyə hazır olasan”.

Söhbət zamanı sənətçi pulunu qənaətlə xərclədiyini də söylədi:

"Əvvəl bir yerə gedəndə 10 manat xərcləyirdimsə, indi 1 manat xərcləyirəm. Həmişə düşünürdük ki, toylarımız var, ürəkli xərcləyirdik. Ancaq indi elə deyil axı. Düzü, indiyə qədər maddiyatla bağlı heç bir sıxıntım olmayıb. Yenə də sabahı düşünməliyik, çünki pandemiyanın nə vaxt bitəcəyi bəlli deyil”.

Müğənni Nadir Bayramlı hazırkı vəziyyətindən şikayətçi olmadığını vurğuladı:


"Mənim müğənnilikdən başqa, digər bir sənətim yoxdur. Neyləmək olar ki, bir təhər dolanarıq. Bu müddətdə isə sənətimlə məşğulam. Kiçik bir səsyazma studiyam var. Demək olar ki, hər gün orada oluram. "Çətin günün ömrü az olur” deyiblər, yəqin ki, bu vəziyyətdən də üzüağ çıxarıq”.

Əməkdar artist Sahib İbrahimov isə, müğənnilikdən başqa, pedaqoji fəaliyyətlə məşğul olduğunu qeyd etdi:

"On altı ildir ki, Bülbül adına orta ixtisas məktəbində müəllim kimi çalışıram. Buna görə də dövlətdən bəlli miqdarda maaş alıram. Eyni zamanda müharibə veteranı olduğuma görə də müavinət alıram, beləcə ailəmizi dolandıra bilirik. Hələ ki, sıxıntılarımız olmayıb, yəni, obyektiv səbəblərdən biz bu vəziyyətlə üz-üzə dayanmışıq. Erməni kimi bir virusdan canımızı qurtara bilmişiksə, koronanın çətinliyindən narahat olmağa dəyməz. Hər şeyin öz axarına düşəcəyinə ümid edirik”.

---

---