Postsovet respublikalarının müstəqilliyi ilə barışa bilməyən Rusiya rəsmiləri “Laçın” sərhəd-buraxılış məntəqəsinin yaradılmasını “Laçın dəhlizinin blokadaya alınması” hesab edir və buna görə Azərbaycanı “Rusiya sülhməramlıları vəziyyətə yerdəki proseslərə uyğun cavab verəcəyi” ilə hədələyirlər.

Reyting.az məlumatına görə, bunu politoloq Xəqani Cəfərli Rusiya Xarici İşlər Nazirliyinin sözçüsü Mariya Zaxarovanın atəşkəs rejiminin pozulması hallarının artmasından və Laçın dəhlizinin “blokadaya” alınması haqqında fikirlərini şərh edərkən deyib.

X. Cəfərli əlavə edib ki, Ukraynada ağır itkilər verən Rusiyanın Azərbaycanı hədələməsi Ukraynada qalib olacağı təqdirdə Azərbaycana qarşı sərt davranacağı haqqında aylar öncə söylədiklərini təsdiqləyir. Onun sözlərinə görə, bu gerçəkliklər ortada olduğu halda Rusiyanın qələbəsini arzulayanların kimə və nəyə xidmət etdiyi aydın olur.

Politoloq qeyd edib ki, quru qoşunlarının 94 faizi Ukraynaya qarşı müharibəyə cəlb olumuş Rusiyanın Azərbaycana qarşı hərbi əməliyyat keçirmək imkanı yoxdur: “Əksinə, belə bir avantüra Dərbənd başda olmaqla Şimal torpaqlarımızın azad olunmasının və Rusiyanın Xəzərdəki donamasının məhv edilməsinin yolunu açacaq. Ona görə də Azərbaycan dövləti və cəmiyyəti Rusiyanın təhdidlərinə sərt cavab verməlidir”.

X. Cəfərli bildirib ki, ölkəmizi təhdid edən Rusiyanın Azərbaycan cəmiyyətində təbliğatının qarşısı alınmalıdır.

X. Cəfərli açıqlamasını bu fikirlərlə yekunlaşdırıb:

“Şuşa azad olduğu kimi, Dərbənd də mütləq azad ediləcək. Kimsə buna şübhə etməsin!”.

---

---