Gəncə Dövlət Universitetində silsilə tədbirlər davam edir

Xəbər başlıqları

12:28 – İlham Əliyev İsrailin nəqliyyat və yol təhlükəsizliyi nazirini qəbul edib
12:46 – Prezident Millətlər Birliyi təşkilatının Baş katibi ilə görüşüb
11:04 – İlham Əliyev Leonid Slutski ilə görüşüb
14:08 – Prezident SABAH proqramı ilə bağlı sərəncam imzaladı

Gəncə Dövlət Universitetində silsilə tədbirlər davam edir - ÖZƏL

31-10-2022, 11:35 63 dəfə baxılıb

GƏNCƏ DÖVLƏT UNİVERSİTETİNDƏ “ZƏFƏRƏ GEDƏN YOL” ADLI TƏDBİR KEÇİRİLMİŞDİR

Gəncə Dövlət Universitetinin Kimya- Biologiya fakültəsində “Zəfərə gedən yol” adlı tədbir keçirilmişdir.

Tədbirdə Azərbaycanın Dövlət Himni səsləndirilmiş və Vətən müharibəsində həlak olmuş şəhidlərimizin əziz xatirəsi bir dəqiqəlik sükutla yad edilmişdir.

Gəncə Dövlət Universitetinin Humanitar məsələlər üzrə prorektoru, dosent Gülsüm Fətəliyeva tədbiri giriş sözü ilə açaraq Azərbaycanın 44 gün ərzində keçdiyi şanlı Zəfər yolundan danışmışdır. Qeyd etmişdir ki, Prezident İlham Əliyevin ordu quruculuğu sahəsində həyata keçirdiyi tədbirlər nəticəsində müasir tələblərə cavab verən, istənilən döyüş tapşırığını ən yüksək səviyyədə yerinə yetirməyə qadir olan Azərbaycan Ordusu 44 günlük Vətən müharibəsində tarix yazdı. Bu gün bayrağımız qəhrəman Azərbaycan oğullarının canları bahasına azad etdikləri torpaqlarda dalğalanır.

Gəncə Dövlət Universitetinin Ekologiya və təbiətin mühafizəsi kafedrasının müdiri Sevda Əhmədova, Kimya-Biologiya fakültəsinin dekanı İsfəndiyar Alverdiyev çıxışlarında Azərbaycan Respublikasının Prezidenti İlham Əliyevin rəhbərliyi ilə şanlı Ordumuzun Vətən müharibəsində qazandığı qələbələrindən, mərd Azərbaycan əsgərlərinin qəhrəmanlıqlarından və xalqın dəmir yumruq kimi birləşərək Zəfər çalmasından danışmışlar.

Tədbirdə universitetin Kimya-Biologiya fakültəsinin tələbələri tərəfindən vətənpərvərliyə aid şeirlər və mahnılar səsləndirilmişdir. Vətən müharibəsi zamanı şəhidlərin, qazilərin və müharibə iştirakçılarının misilsiz şücaətlərini əks etdirən videoçarx da nümayiş etdirilmişdir.

Mətbuat və ictimaiyyətlə əlaqələr xidməti.

GDU-DA QARABAĞ MÜHARİBƏSİNİN İŞTİRAKÇILARI VƏ QAZİLƏRLƏ GÖRÜŞ KEÇİRİLMİŞDİR

Gəncə Dövlət Universitetinin Azad Həmkarlar İttifaqı Komitəsinin təşkilatçılığı ilə I və II Qarabağ müharibəsinin iştirakçıları və qazilərlə görüş keçirilmişdir.

Gəncə Dövlət Universitetinin Tədris məsələləri üzrə prorektoru, dosent Şahin Xurşudov, universitetin Humanitar məsələlər üzrə prorektoru, dosent Gülsüm Fətəliyeva və Universitetin Elm və innovasiyalar üzrə prorektoru, millət vəkili Pərvin Kərimzadə, rektorun baş müşaviri Asif Cavadov, universitetin Azad Həmkarlar İttifaqı Komitəsinin sədri Afaq Qasımova, Botanika kafedrasının müdiri professor Vaqif Novruzovun iştirak etdiyi görüşdən öncə şəhidlərə həsr edilmiş Xatirə guşəsi önünə gül dəstəsi qoyulmuşdur.

Sonra Azərbaycanın Dövlət Himni səsləndirilmiş, ölkəmizin suverenliyi və ərazi bütövlüyü uğrunda gedən döyüşlərdə şəhidlik zirvəsinə ucalmış qəhrəman övladlarımızın xatirəsi bir dəqiqəlik sükutla yad edilmişdir.

Görüşdə 44 günlük Vətən müharibəsində Prezident, Müzəffər Ali Baş Komandan İlham Əliyevin rəhbərliyi altında Azərbaycan Ordusunun döyüş meydanında əldə etdiyi şanlı Zəfər, ordumuzun qəhrəmanlıqları və işğaldan azad edilən toqpaqlar haqqında söhbət açılmışdır. Qeyd edilmişdir ki, Azərbaycan xalqı ən məğrur, yenilməz xalq kimi, ordumuz isə dünyanın ən güclü, peşəkar ordusu kimi tarixə yazıldı. Rəşadətli Azərbaycan Ordusu sentyabrın 27-dən Ermənistanın hərbi təcavüzünə cavab olaraq, 30 ildən artıq işğal altında olan torpaqlarımızı azad etmək üçün genişmiqyaslı əks-hücum əməliyyatları həyata keçirməklə düşmənin bu illər ərzində yaratdığı “yenilməzlik” mifini darmadağın etdi. Xalqımız Ali Baş Komandanın ətrafında tək yumruğa çevrildi.

Görüşdə I və II Qarabağ müharibəsinin qaziləri və iştirakçıları çıxış edərək döyüşlərlə bağlı xatirələrini danışmış və onlara göstərilən diqqət və qayğıya görə ölkə başçısına və universitetin rəhbərliyinə minnətdarlıqlarını bildirmişlər.

GDU-NUN BİR QRUP ƏMƏKDAŞI “MENTORUN 72 SAATI” ADLI “BOOTSAMP” TƏDBİRİNDƏ İŞTİRAK ETMİŞDİR

Gəncə Dövlət Universitetinin bir qrup əməkdaşı Şamaxı şəhərində keçirilən “Mentorun 72 saatı” adlı “Bootcamp” tədbirində iştirak etmişdir.

3 gün davam edən tədbir Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin “İnnovasiyalar Mərkəzi” tərəfindən həyata keçirilən “Gələcək üçün bacarıqlar” layihəsinin növbəti komponenti olan yeni “Mentorluq üzrə ixtisaslaşma proqramı”na keçid məqsədilə reallaşdırılıb.

“Mentorun 72 saatı” adlı “Bootcamp” tədbiri təlimçilərin çıxışları ilə davam etmişdir. Böyük şirkətlərin konsultantı, Amerikanın “Korn Ferry” şirkətinin Türkiyə filialının icraçı direktoru Şerif Kaynarın onlayn şəkildə görüşü iştirakçılar tərəfindən böyük maraqla qarşılanıb. “Mentorun 72 saatı” adlı “Bootcamp” tədbirinin növbəti təlimi “Şəbəkələşmə” mövzusunda olub. Bu mövzuda çıxış edən “İnnovasiyalar Mərkəzi”nin İnsan resursları şöbəsinin müdiri Aytən Şıxəliyeva uğurlu şəbəkələşmənin qızıl qaydaları, insanın təmsil sistemləri və davranış modellərindən, həmçinin onların şəbəkələşmədə olan önəmi haqqında danışıb. Növbəti günlərdə “ASAN İnnovativ İnkişaf Mərkəzi”nin müdir müavini Hasil Abbasov, “İnnovasiyalar Mərkəzi”nin Layihələrin idarə edilməsi departamentinin müdiri Şəbnəm Məmmədova, Kapital Bankın İnnovasiya proqramının rəhbəri Tariyel Ağazadə, startap mentor Levent Burak Demiralp, “Bilim Bakı” mərkəzinin direktoru Yusuf Polat və Klinik psixoloq Şərafət Şirinli maraqlı mövzularla əlaqəli interaktiv təlim keçiblər.

Tədbirdə “Rəqəmsal dünyada yenilik”, “Şəbəkələşmə”, “Liderlik bacarıqları”, “Komandanın effektiv idarə olunması”, “Startup pitching”, “Mentorluq, texnika və mexanizmləri”, “Startapın həyat dövrü”, “Təqdimat bacarıqlarının inkişaf etdirilməsi”, “Maliyyə cəlb edilməsi strategiyaları”, “Emosional intellekt” və “İdeya müsabiqəsi – İnnovativ məhsul inkişafı” mövzularında təlimlər keçirilib, komandalar üzrə iş təşkil olunub. Həmçinin “Bilim Bakı” Mərkəzinin rəhbəri “Milli Teknoloji Hamlesi T3 Vakfı & Teknofest” haqqında da məlumat verib.

İnteraktiv şəkildə keçən təlimdə iştirakçıların sualları cavablandırılıb.

GƏNCƏ DÖVLƏT UNİVERSİTETİNİN TƏLƏBƏLƏRİ HEYDƏR ƏLİYEV MƏRKƏZİNƏ EKSKURSİYA ETMİŞLƏR

Gəncə Dövlət Universitetinin Tələbə Gənclər Təşkilatının təşkilatçılığı ilə universitetin fəal gəncləri Heydər Əliyev Mərkəzinə ekskursiya etmişlər. Tələbələrə burada fəaliyyət göstərən Heydər Əliyev Muzeyi haqqında məlumat verilmişdir. Qeyd edilmişdir ki, muzeydə Ulu Öndərin uşaqlıq və gənclik illəri, zəngin fəaliyyətinin bütün dövrləri barədə ətraflı məlumat almaq mümkündür.

Tələblərə məlumat verilib ki, muzeydə Azərbaycanın rifahı, gözəl gələcəyi naminə sosial-iqtisadi inkişafa yol açan layihələr, ordu quruculuğu, xarici siyasət, mədəniyyətə aid maraqlı fotolar, kitablar və qəzetlərə də geniş yer verilib.

Muzeydə Ümummilli Lider Heydər Əliyevin Gəncə şəhərinə müxtəlif illərdə tarixi səfərlərini əks etdirən kitablar və qəzetlər də nümayiş etdirilir.

GDU-DA ŞƏHİD HİKMƏT MƏMMƏDOV VƏ ŞƏHİD ORXAN CÜMŞÜDOVUN ƏZİZ XATİRƏSİNƏ HƏSR EDİLMİŞ “XARIBÜLBÜL” ADLI TƏDBİR KEÇİRİLMİŞDİR

Gəncə Dövlət Universitetinin İqtisadiyyat və İdarəetmə fakültəsində II Qarabağ müharibəsinin qəhrəmanlarından olan şəhid Hikmət Məmmədov və şəhid Orxan Cümşüdovun əziz xatirəsinə həsr edilmiş “Xarıbülbül” adlı tədbir keçirilmişdir.

Tədbirdə Gəncə Dövlət Universitetinin Tədris məsələləri üzrə prorektoru, dosent Şahin Xurşudov, universitetin Humanitar məsələlər üzrə prorektoru, dosent Gülsüm Fətəliyeva, İqtisadiyyat və İdarəetmə fakültəsinin dekanı, dosent Məsim Abadov və şəhidlərin ailə üzvləri iştirak etmişlər.

Tədbirdə Dövlət Himni səsləndirilmiş və Vətən müharibəsində həlak olmuş şəhidlərimizin əziz xatirəsi bir dəqiqəlik sükutla yad edilmişdir.

Şəhidlərimizə həsr edilən tədbiri giriş sözü ilə Universitetinin Humanitar məsələlər üzrə prorektoru, dosent Gülsüm Fətəliyeva açaraq qeyd etmişdir ki, bu gün Azərbaycan xalqında milli vətənpərvərlik hissinin yüksək olması qürürvericidir. Gəncə Dövlət Universitetində tez-tez qazilərlə və şəhid ailələrinin üzvləri ilə görüşlər keçirilir, onların döyüş yolları, göstərdikləri qəhrəmanlıqlar tələbələrə çatdırılır.

Çıxış edən şəhidin ailə üzvləri Hikmət Məmmədov və Orxan Cümşüdovun döyüş yolundan, qəhrəmanlıqlarından danışmışlar Qeyd edilmişdir ki, Universitetinin İqtisadiyyat və İdarəetmə fakültəsinin məzunları olmuş şəhid Hikmət Məmmədov və şəhid Orxan Cümşüdov daim fəalliyyətləri ilə seçilmişlər. Bildirilmişdir ki, Azərbaycanın ərazi bütövlüyünün təmin edilməsi uğrunda döyüş əməliyyatlarına qatılan və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Azərbaycan Prezidenti İlham Əliyevin Sərəncamına əsasən Cümşüdov Orxan Sabutay oğlu ölümündən sonra “Vətən uğrunda”, “Füzulinin azad olunmasına görə” medalları, Goranboy rayonunun Buzqulaq kəndi istiqamətində döyüş tapşırığını yerinə yetirərkən həlak olmuş şəhid Məmmədov Hikmət Lətif oğlu isə ölümündən sonra “Vətən uğrunda”, “Kəlbəcərin azad olunmasına görə” medalları ilə təltif edilmişlər.

Tədbirin davamında Gəncə Dövlət Universitetinin tələbələri tərəfindən vətənpərvərlik mövzusunda şeirlər və mahnılar səsləndirilmişdir.

Qeyd edək ki, həmin gün Universitetinin İqtisadiyyat və Idarəetmə fakültəsində şəhid Hikmət Məmmədov və şəhid Orxan Cümşüdov adına auditoriyaların da açılışı olmuşdur. Auditoriyalarla tanışlıq zamanı qeyd edilmişdir ki, burada olan fotostend vasitəsi ilə şəhidlərin keçdikləri həyat yolu daim öyrəniləcəkdir.

Hər iki şəhidin ailə üvzləri – şəhid Hikmət Məmmədov və şəhid Orxan Cümşüdov adına auditoriyanın hazırlanaraq tələbələrin ixtiyarına verilməsinə görə universitet rəhbərliyinə öz minnətdarlıqlarını bildirmişlər.