Üç gün əvvəl redaksiyada Çində yayılan koronavirusun Azərbaycana keçmə ehtimalını müzakirə edirdik.

Qərarlaşdıq ki, bu virusun əsas zərər verəcəyi yerlərdən biri “Sədərək” Ticarət Mərkəzi ola bilər. Ona görə də “Sədərək” Ticarət Mərkəzindən reportaj etməklə bağlı razılaşdıq.

Nəhayət, dünən “Sədərək” Ticarət Mərkəzinə yola düşdüm. Səhər evdən çıxanda artıq reportajın formatı beynimdə hazır idi. Nəzərə alsaq ki, həm əhalinin böyük əksəriyyəti “Sədərək” Ticarət Mərkəzindən alış-veriş edir, həm də malların daha çox Çindən gətirilməsi deyilir, deməli, koronavirusun da ilk zərbəsinə məhz ora tuş olacaq. "Çin malları", "Sədərək", kornovirus - bu üç fikir beyinə gələndə, nə qədər özünü tox tutmağa çalışsan da, indiki xəbərlərin fonunda həyəcanı gizlətmək olmur. yayılma riski də artmış olur. Adamın beynində koronavirusu kabus kimi dolaşır, içinəbir narahatlıq düşür...

Sürücüdən “getmə” məsləhəti

Evdən çıxanda artıq saat 08:30 idi. Hövsandan “28 May”a gedən “1 manatlıq” taksiyə mindim. Taksi sürücüsü tanış olduğundan söhbətləşməyə başladıq. Söhbət əsnasında “Sədərək” Ticarət Mərkəzinə reportaj üçün getdiyimi, Çində yayılan koronavirusun alverə necə təsir etdiyini müşahidə edəcəyimi dedim. Sürücü getməməyimi məsləhət gördü: “Qardaş, biz də “Sədərəy”ə getməli idik. Amma virusun yayılmasına görə fikrimi dəyişdim. Bilirəm ki, bütün mallar Çindən gəlir. Bir paltara görə özümü riskə ata bilmərəm. Sən də atma!”

“28 May”a çatdım və sürücünün 1 manatını verib sağollaşdım. Metronun qarşısından “20-ci Sahə” adlanan əraziyə getmək üçün 125 nömrəli marşruta mindim. Ancaq o zaman bildim ki, deməyəsən, bu xətt üzrə qiymət qalxıb. Əvvəl 35 qəpik olan qiymət hazırda 40 qəpikdir. “20-ci sahə”də “Sədərək” Ticarət Mərkəzinə gedən köhnə avtobusa minməli oldum. Detalları ona görə yazıram ki, yolçulqula bağlı mənzərə aydın olsun.

Boşalan bazar...

Mənzil başına çatanda artıq ilk müşahidələrim fərqli düşüncə yaratdı. “Sədərək” Ticarət Mərkəzində demək olar ki, heç kim yox idi. Bir müddət əvvəl insan əlindən tərpənməyə yer olmayan “Sədərək”də bu gün fərqli mənzərə hökm sürürdü. İlk olaraq karqo şirkətlərinin olduğu əraziyə baş çəkdim. Şirkətlərdə çalışan fəhlələr öz aralarında söhbət edirdilər. Heç bir iş getmirdi. Yaxınlaşıb söhbətləşmək istədim.

-Salam, deyəsən, iş yoxdur?

-Salam, hə, qardaş, bir neçə gündür bekarçılıqdır, niyə soruşdun ki? Nəsə lazımdır?

-Yox, sadəcə iş axtarırdım, dedim bəlkə burada taparam.

-Yox e, qardaş, iş nə gəzir? Bax ora...

Əli ilə mənə “Çin Karqo”nu göstərdi:

-Orada heç vaxt iş dayanmırdı. Amma bax, heç kim işləmir. Nə maşın gəlir, nə yük boşalır.

-Niyə, nə olub ki?

-Bilmirəm, amma deyirlər ki, Çində xəstəlik yayılıb deyə ordan mal gətirməyə icazə vermirlər.

Bekarçılıqdan nərd oynayırlar...

Sağollaşıb “Sədərək” Ticarət Mərkəzinin topdan və pərakəndə satış obyektlərinə tərəf getdim. Diqqəti cəlb edən ilk mənzərə alıcıların olmaması idi. Satıcılar nərd oynamaqla vaxtlarını keçirirdilər. Bir müddət müşahidə etdikdən sonra paltar satılan dükanlara girib qiymətlərlə maraqlanmağa başladım. Qiymətlər kifayət qədər ucuz idi. Hətta satıcılar özü də bundan şikayət edirdilər. Adil adlı satıcı ilə söhbətləşdim:

-Qiymətlər niyə belədi? “Bütün mallar 15 manat” yazmısız.

-Neynəyək, qardaş, alıcı yoxdur. Gündə 2-3 şalvar satanda sevinirik. Əvvəl biz bu şalvarı (Əlini göy cins şalvara uzadır-müəll.) 27-28 manata satırdım. İndi 15 manata qoymuşam, amma sata bilmirəm.

-Bəlkə virusla bağlıdır?

-Nə virusu?

-Deyirlər, Çində virus yayılıb, ona görə mal gətirilmir, alıcılar da bazara gəlməyə qorxur.

-Ümumiyyətlə, burada nə qədər obyekt görürsən, hamısı Çindən mal vurur. Düzdür, son günlər mal götürmürük, amma virusa görə deyil, çünki sata bilmirik.

Adillə sağollaşıb bir qədər irəliləmişdim ki, maraqlı görüntü ilə qarşılaşdım. Obyektlərin birinin qarşısında Azərbaycan, Türkiyə və Pakistanın bayrağı asılmışdı. Satıcıdan niyə bu üç bayrağın asıldığının səbəbini soruşdum. Cavab belə oldu:

- Mallarımız Türkiyə və Pakistandan gəlir, ona görə bu bayraqları asmışıq ki, insanlar bilsin.

Sağollaşıb “Sədərək” Ticarət Mərkəzini tərk etdim. Müşahidələrimgöstərirdi ki, “Sədərək”də vəziyyət o qədər də ürəkaçan deyil. Alıcı da yoxdur, yeni mal da. Səbəbin nə olduğu hər kəsə məlumdur. Çindən gələn mallar özü ilə koronavirus gətirəcəksə... Hər halda iş adamları üç nöqtənin yerinə nəsə fikirləşiblər.

Cebhe.info

---

---