27 Sentyabr - Anım Günündə Vəhdət Partiyasının rəhbərliyi və üzvləri Vətən müharibəsində əldə edilmiş şanlı qələbənin, Zəfər tariximizin əbədiləşdirilməsi və şəhidlərimizin əziz xatirəsinə ehtiramın növbəti ifadəsi olan Zəfər Parkında olublar.

Vəhdət Partiyasının Sədri Adəm İsmayıl Bakuvi Zəfər Parkını ziyarət zamanı bildirib ki, xalqımızın şərəf və qürur zirvəsi olan igid şəhidlərimizin əziz xatirəsi yaddaşlarımızda əbədi yaşayacaqdır:

“Onların qəhrəmanlığı heç zaman unudulmayacaq, hər qarış torpağımızda, hər nəfəsimizdə, hər qələbə sevincimizdə daim var olacaqlar.

Şəhidlərimizin müqəddəs ruhu qarşısında baş əyir, onların qanı bahasına bərpa edilmiş ərazi bütövlüyümüzü daim qorumalı olduğumuzu bir daha dərk edirik.

Ruhunuz şad olsun, əziz şəhidlər! Şəhidlər ölməz, Vətən bölünməz!”

Sonra Vəhdət Partiyasının rəhbərliyi və üzvləri Zəfər Parkındakı xatirə daşının önünə gül dəstələri düzüb, ölkəmizin ərazi bütövlüyü uğrunda canlarından keçən qəhrəmanlarımızı dərin hörmətlə yad ediblər.

Qeyd edək ki, 2020-ci ilin 27 sentyabr tarixində başlayan Vətən müharibəsi ilə 44 gün ərzində Azərbaycan əraziləri işğaldan azad olunub.

---

---