ABŞ-də yanacaqdoldurma məntəqələrinin sistemləri haker hücumuna məruz qalıb.

“Bu barədə CNN məlumat yayıb.

Bildirilib ki, ABŞ rəsmiləri bir neçə ştatda yanacaqdoldurma məntəqələrinin yanacaq çənlərini izləyən sistemlərə edilən kiberhücumların arxasında İranla əlaqəli hakerlərin dayandığını ehtimal edir.

Məlumata görə, hakerlər internetə açıq və parolla qorunmayan avtomatik çənölçmə sistemlərinə (ATG) daxil olublar. Onlar bəzi hallarda sistem göstəricilərinə müdaxilə etsələr də, yanacaq səviyyələrini dəyişə bilməyiblər.

ABŞ rəsmiləri hücumların fiziki zərər yaratmadığını bildirsələr də, belə müdaxilələrin təhlükəsizlik risklərini artırdığını vurğulayıblar.

Qeyd edilib ki, bu tip sistemlərə giriş əldə edilməsi yanacaq sızmalarının gizli qalmasına səbəb ola bilər.

Vurğulanıb ki, İranın daha əvvəl də enerji və infrastruktur sistemlərini hədəf alması onu əsas şübhəlilərdən birinə çevirir. Bununla belə, hücumun arxasında kimin dayandığını tam müəyyən etmək hələ mümkün olmayıb.

ABŞ rəsmiləri hesab edir ki, hadisə İranla bağlı artan kibertəhlükələrin növbəti nümunəsi ola bilər.

---

---