ABŞ prezidenti Donald Tramp Ukraynanın ABŞ-dən “Patriot” hava hücumundan müdafiə sistemləri alacağını təsdiqləyib.

Ancaq silahların pulunu Vaşinqton yox, NATO ölkələri ödəyəcək.

Tramp bildirib ki, ABŞ Ukraynanı müasir silahlarla, o cümlədən “Patriot” sistemləri ilə təmin edəcək, lakin xərclər NATO müttəfiqlərinin üzərinə düşəcək. O, bunun Amerika iqtisadiyyatı üçün faydalı olacağını vurğulayıb.

“Ümumiyyətlə, biz onlara çox müasir silahların müxtəlif nümunələrini göndərəcəyik və bunun üçün bizə 100 faiz ödəyəcəklər. Bizim istədiyimiz məhz budur. Biz uzun müddətdir ki, buna nail olmağa çalışırıq. Düşünmürəm ki, Bayden bunu heç istəyib”, - ABŞ prezidenti bildirib.

O xatırladıb ki, ABŞ Ukrayna savaşına artıq 350 milyard dollara yaxın, Avropa isə cəmi 100 milyard dollar xərcləyib. Onun fikrincə, müttəfiqlər Amerikadan çox xərcləməlidirlər.

Tramp əlavə edib ki, təhvil veriləcək silahların dəqiq miqdarı hələ müəyyən edilməyib, lakin Ukrayna avadanlığın bir hissəsini mütləq alacaq.

“Bu, bizim üçün iş olacaq. Biz isə onlara çox ehtiyacı olan “Patriot”ları göndərəcəyik, çünki Putin həqiqətən çoxlarını təəccübləndirib. O, gözəl danışır, sonra axşam hamını bombalayır”, - Tramp bildirib.

Bundan əvvəl Tramp artıq bəyan edib ki, NATO ölkələrinə silah ödənişli əsaslarla verilməlidir, bundan sonra onların Ukraynaya təhvil verilib-verilməməsinə özləri qərar verə bilərlər.

---

---