Rusiya Ukrayna və onun müttəfiqlərinə qarşı hücumları artırarsa, Amerika təyyarədaşıyan gəmisi beynəlxalq hücuma rəhbərlik etməyə hazırdır.

Bu barədə “Newsweek” yazır.

Mətbu orqanının yazdığına görə, artıq “George HW Bush” (CVN 77) təyyarədaşıyan gəmisi Adriatik dənizindədir.

Admiral Denis Velez deyib ki, Ukraynadakı müharibənin sona çatmasını, regionda sülhün, sabitliyin bərpa olunmasını istəyirlər və buna hazırdırlar.

NATO-nun baş katibi Yens Stoltenberq çərşənbə axşamı "təsirli" təyyarədaşıyan gəmini ziyarət edərək deyib ki, NATO müdafiə ittifaqıdır:

“Bizim çəkindirmə qabiliyyətimiz münaqişənin qarşısını alır və sülhü qoruyur. Gücümüz aydın mesaj verməklə hər hansı səhv hesablamanın qarşısını almağa kömək edir. NATO müttəfiq ərazisinin hər qarışını müdafiə edəcək”.

O, həmçinin Rusiyaya xəbərdarlıq edib ki, “daha da gərginləşmək üçün yalan bəhanələrdən istifadə etməsin”.

---

---