Məlum olduğu kimi, bu gün əlbəyaxa döyüş növləri bütün dünyada getdikcə populyarlığını artıran idman nölərindəndir. Təbii ki, Azərbaycanda da bu idman növünə böyük maraq vardır. Qeyd etmək lazımdır ki, Azərbaycan Universal Döyüş Federasiyasının məqsədyönlü və səmərəli fəaliyyəti ölkəmizdə əlbəyaxa döyüş növlərinə marağın artmasını daha da stimullaşdırır. Belə ki, SSRİ İdman ustası, Əməkdar Məşqçi, Azərbaycan Respublikası Əməkdar Bədən Tərbiyəsi və İdman Xadimi Azər Həsənovun rəhbərlik etdiyi bu federasiyanın idmançıları mütəmadi olaraq istər Azərbaycanda, istərsə də xarici ölkələrdə keçirilən mötəbər yarış və turnirlərdə əldə etdikləri qələbələrlə bütün Azərbaycan gəncliyi üçün əsl örnək olurlar.
Digər tərəfdən isə, Azərbaycan Universal Döyüş Federasiyası belə maraqlı yarış və turnirləri mütəmadi olaraq ölkəmizdə də keçirməklə əlbəyaxa döyüş növlərinin ən yüksək səviyyədə təbliğini də həyata keçirir. Növbəti belə möhtəşəm turnirlərdən biri də paytaxt Bakıda 31 iyul tarixində təşkil olunub. Azərbaycan Universal Döyüş Federasiyası, Azərbaycan Peşəkar Universal Döyüş Liqası və “Qartal” Peşəkar İdman Klubunun birgə layihəsi olan bu turnir Peşəkarlar Arasında Reytinq Yarışları xarakteri daşıyıb.
7 çəki dərəcəsi üzrə keçirilən yarışda 55 kq Zəfər Abdulrəhmanov (Xaçmaz, “Əhməd Fight Club”); 60 kq çəki dərəcəsində Elvin Huseynli (Şəki “Qafqaz” idman klubu); 65 kq çəkidə Miradəm İbrahimov (Biləsuvar, “Zəfər” idman klubu); 70 kq çəkidə Nurlan Babayev (Xaçmaz, “Əhməd Fight Club”); 80 kq çəkidə Murad Şeldiyev (Bərdə, “Laçın” İK); +90kq çəlkidə Vahid Əsəadov (Yevlax idman klubu) və qadın idmançılar arasında 65 kq çəkidə Fərqanə Saxrayeva (Yevlax idman klubu) yarışın qalibləri olmuşlar. Turnirin qalibləri həmçinin növbəti beynəlxalq yarışlarda iştirak etmək hüququ verən lisenziya əldə etmişlər.
Qeyd edək ki, Azərbaycan Universal Döyüş Federasiyasının prezidenti Azər Həsənovun rəhbərliyi və “Qartal” Peşəkar İdman Klubunun prezidenti Yaqub İbrahimovun təşkilatçılığı ilə keçirilən bu yarış “Kəhriz” sularının baş sponsorluğu və “Berg” enerji içkilərinin, “Academy Qalib Hazırlıq Kursları”nın sponsorluğu, “AF Hotel”in və “The Post” İstirahət Mərkəzinin təşkilatı dəstəyi və AİA.az (Azərbaycan İnformasiya Agentliyi) saytının informasiya dəstəyi ilə təşkil keçirilib.

---

---