Deputat Tahir Kərimli Milli Məclisdə qonşuları ilə birlikdə yaşadığı binadan köçmək məcburiyyəti qarşısında qaldığını bildirib.

BEŞ.AZ oxu.az-a istinadən xəbər verir ki, deputat T.Kərimli parlamentdə çıxışı zamanı paytaxtın Zərifə Əliyeva küçəsində çoxmənzilli yaşayış binalarının birində yaşadığını deyib, burada mövcud olan hostellərlə bağlı problemləri qabardıb:

“Bildiyiniz kimi, çoxmənzilli təzə binaların aşağı mərtəbələrinin hostel kimi istifadə edilməsinə şərait yaradılıb. Bu isə bir çox hallarda öz mənfi nəticələrini göstərir. Əxlaqsızlıq yuvalarının yaranmasına gətirib çıxarır. Artıq qonşularla bezmişik. Oradan köçmək məcburriyyətində qalmışıq.

Kimsə özünü qanundan yuxarı göstərir, belə şeylərə şərait yaradır. Bizim küçə mərkəzi küçədir. Oradan dünyanın hər yerindən gəlib keçən dövlət və hökumət nümayəndələri var. Birdən bu hal kiminsə qabağına çıxar. Ona görə də binaların yuvalara çevrilməsinin qarşısı alınmalıdır”.

Öz növbəsində parlamentdə hesabat verən daxili işlər nazirinin birinci müavini Vilayət Eyvazov məsələyə münasibət bildirib.

V. Eyvazov bildirib ki, bununla bağlı izahat tədbirləri olmalıdır:

“Bu problemi həll etmək mümkündür. Biz inzibati yolla yox, ancaq maarifləndirmə yolu ilə bunu edə bilərik”.

Deputat Araz Əlizadə isə hesab edir ki, belə halların yaranmaması üçün hostellərin girişi ayrı olmalıdır.

---

---